Səki olmadıqda mütəşəkkil piyada dəstələrinə yalnız nəqliyyat vasitələrinin hərəkəti istiqamətində, yolun hərəkət hissəsinin sağ tərəfi ilə, bir cərgədə  dörd nəfərdən çox olmamaq şərti ilə getməyə icazə verilir. Dəstənin qabağında və arxasında sol tərəfdə müşayiətçilər getməlidir. Müşayiətçilərin əlində sutkanın işıqlı vaxtı qırmızı bayraqcıqlar, qaranlıq və məhdudiyyətli görünmə şəratində isə yandırılmış fənərlər olmalıdır. Qabaqda gedən müşayiətçi ağ rəngli, arxada gedən müşayiətçi isə qırmızı rəngli fənəri yandırılmış vəziyyətdə sürücülərin görməsi üçün əlində tutmalıdır.
          Uşaqların isə dəstə halında yalnız sutkanın işıqlı vaxtı və böyüklərin müşayəti ilə ancaq səki ilə, piyada yolu ilə, bunlar olmadıqda isə yolun çiyni ilə aparmağa icazə verilir.
          Yaşayış məntəqələrində səkisi və piyadalar üçün yolu olmayan küçələrdə, həmçinin şəhər ətrafında kənarları olmayan yollarda  piyadalar küçənin (yolun) sol tərəfi ilə hərəkət etməlidirlər.
          Piyadalar belə hərəkət etdikdə onlar qarşıdan gələn nəqliyyatı görər və  təhlükəsizliyin təmin edilməsi üçün vaxtında lazımi tədbirlər görə bilərlər.
          Əl arabaları və velosipedlərlə ancaq yolun sağ kənarı ilə hərəkət etmək lazımdır. Uşaq kolyaskalarını isə səki ilə ya da yolun sağ kənarı ilə aparmağa icazə verilir.
          Səkinin üzərində hər hansı bir maneə olduqda, ya da orada piyadalar toplandıqda piyada, hərəkətin təhlükəsizliyini yəqin etdikdən sonra  səkidən yolun hərəkət hissəsinə düşməli, maneəni keçdikdən sonra  isə  yenidən səkiyə çıxaraq hərəkəti davam etdirməlidir.
          Piyadalar küçəni, yaxud yolu keçmək üçün yalnız bu məqsədlə ayrılmış xüsusi yerlərdən, körpülərdən, yaxud yeraltı və yerüstü keçidlərdən, göstəricilər, yol nişanları və ya xətlərlə ayrılmış piyada keçidlərindən keçməlidirlər.
          Əgər görünmə zonasında piyada keçidi və ya yol ayrıcı olmadıqda yolun hərəkət hissəsini ayırıcı zolaq olmayan və sədd çəkilməyən hər iki tərəfdən yaxşı görünən sahələrdə  çəpinə deyil, düzünə keçmək lazımdır.
          Küçəni belə keçdikdə piyada ancaq hərəkət hissəsinin eni qədər yol qət etmiş olur. Hərəkət hissəsini çəpinə keçdikdə isə piyadanın yolu və bu yolu keçməyə sərf etdiyi vaxt artıq olur. Bundan başqa yolu çəpinə keçdikdə piyadanın arxası  müəyyən dərəcədə nəqliyyatın hərəkəti istiqamətinə tərəf çevrilir ki, bu da həyat üçün təhlükəlidir.
          Əgər piyada keçidlərində nizamlayıcı yoxdursa, yalnız yaxınlaşmaqda olan nəqliyyat vasitələrinə qədər olan məsafəni, onların sürətini qiymətləndirdikdən və bu halda yolu keçməyin onun üçün təhlükəsiz olduğunu yəqin etdikdən sonra piyada yolun hərəkəti hissəsinə çıxaraq  yolu keçə bilər.
          Yolun hərəkət hissəsinə çıxmazdan əvvəl piyada sol tərəfə baxıb nəqliyyatın yaxınlaşmadığını yəqin etməli, yalnız bundan sonra yolun hərəkət hissəsinə çıxaraq yolu ortaya qədər keçməli, sonra sağ tərəfə baxmalıdır. Əgər nəqliyyat yaxınlaşarsa piyada ox xəttinin (və ya təhlükəsizlik adacığının) üzərində dayanaraq nəqliyyatın keçməsini  gözlədikdən sonra ləngimədən yolu keçməyi davam etdirməlidir.
          Piyadalar bütün hallarda qırmızı və ya göy sayrışan və xüsusi səs siqnalı  qoşulmuş nəqliyyat vasitələrinə  yol verməlidirlər. Hərəkət hissəsində olduqda isə bu nəqliyyat vasitələrinə yol verərək hərəkət hissəsini dərhal boşaltmalıdırlar. 
          Eyni ilə nizamlanmayan keçidlərdə, yaxud yanıb-sönən sarı işıqlı svetofor qoyulmuş yerlərdə  piyadalar bütün hallarda yaxınlaşmaqda olan nəqliyyata yol verməlidirlər. 
          Küçənin, yolun hərəkət hissəsini yaxınlaşmaqda olan nəqliyyatın qabağından keçmək piyada üçün təhlükəlidir. Bu qaydalara riayət edilmədiyindən Bakı şəhərində çoxlu sayda  yol nəqliyyat qəzaları baş verir ki, nəticədə insanlar həlak olur, əksər hallarda isə şikəst qalırlar. Yadda saxlamaq lazımdır ki,  hərəkətdə olan nəqliyyatı  birdən-birə dayandırmaq mümkün deyil.
          Yolun sürücülərə çətin görünən yerlərində (döngələrdə, yoxuşlarda və s.) piyadaların dayanmasına və yolu keçməsinə icazə verilmir. Yolu yalnız hər iki tərəfdən aydın görünən yerlərdən keçmək olar.
          Piyadalar küçəni hərəkət nizamlanan yerlərdə küçənin (yolun) keçid hissələrində svetoforun yaşıl işığı, yaxud nizamlayıcının müvafiq icazəverici siqnalında keçməlidirlər. Yadda saxlamaq lazımdır ki, əgər nizamlayıcının sinə və arxa tərəfləri piyadaya çevrilibsə, onda yol ayrıcını keçmək olmaz. Nizamlayıcının sinəsi və kürəyi  (arxası) svetoforun qırmızı işığına müvafiqdir. Həmin istiqamətdə nəqliyyatın və  piyadaların hərəkəti qadağandır. Nizamlayıcının yan tərəfi (çiyni)  piyadaya tərəf çevrilməsi yolu keçməyə icazə verir. Nizamlayıcının sağ əlini yuxarı qaldırması svetoforun sarı işığına  müvafiq olduğu üçün piyadalara yol ayrıcına girməyə icazə verilmir.
          Svetoforla nizamlanan keçidlərdə piyadalar üçün qoyulmuş «keçin», «dayanın» işıq göstəricilərinə ciddi əməl edilməlidir.
          Sutkanın qaranlıq vaxtı piyadalar xüsusilə diqqətli olmalıdırlar. Piyada bilməlidir ki, qarşıdan gələn nəqliyyat vasitəsinin işığı sürücünün gözünə düşdüyünə görə o, yolun işıqlanmayan hissəsində  yolu keçən piyadanı görmür. Buna  görə də  sutkanın qaranlıq vaxtı  yolun işıqlanmayan  hissələrində yalnız görünüş dairəsində nəqliyyat vasitəsi olmadıqda yolu keçmək olar.
          İşıq göstəriciləri əksər hallarda dönən nəqliyyatın hərəkətini nizamlamaq üçün əlavə bölmələri olan svetoforlarla birlikdə  tətbiq edilir. Belə svetoforlar qoyulan yolayrıclarında nəqliyyat  vasitəsi onun əsas işarəsindən asılı olmayaraq əlavə bölmədəki yaşıl işıq yandığı vaxt ox işarəsinin istiqamətində dönə bilər. Deməli, əlavə bölmələrdə işıq yanmasa, piyadalar küçənin hərəkət hissəsini  təhlükəsiz keçə bilərlər.   
          İnzibati Xətalar Məcəlləsində piyadaların yol hərəkəti qaydalarını pozmalarına görə məsuliyyət nəzərdə tutulur.
          Belə ki, piyadalar:
          - piyada svetoforlarına və nizamlayıcının işarələrinə riayət etməməyə görə;
          - yolun hərəkət hissəsini, dəmir yolunu müəyyən olunmayan yerdən keçməyə görə;
          - küçə və yolda yaxınlaşmaqda olan nəqliyyat vasitələrinin qarşısına qəflətən çıxmağa  görə;
          - qırmızı və ya sayrışan işıq və xüsusi səs siqnalı qoşulmuş nəqliyyat  vasitəsi yaxınlaşan zaman yolun hərəkət hissəsini tərk etməməyə görə;
          şərti maliyyə vahidinin 3 misli miqdarında cərimə edilirlər.

Ümumi istifadədə olan nəqliyyatdan istifadə etmək qaydaları

          Ümumi istifadədə olan nəqliyyat dedikdə,  sənişinlərin sərəncamında olan - tramvay, trolleybus, avtobus və taksi başa düşülür.
          Ümumi istifadədə olan nəqliyyatın ən qədim növü tramvaydır. Lap əvvəllər vaqonları atlar çəkərdi. Sonralar atları benzin ilə işləyən mühərrik əvəz etdi. Nə  vaxt sərnişin az olurdu, mühərrikin ağırlığından vaqonun qabaq tərəfi aşağı əyilirdi. Sərnişinlər çox olduqda isə qabaq tərəfi qalxıb, arxa tərəf aşağı enirdi.
          1831-ci ildə Böyük Britaniyanın parlamentində xüsusi Komissiya yaradıldı ki, buxar qüvvəsi ilə işləyən maşınla tanış olsunlar. Komissiya müəyyən etdi ki, bu avtobus kəskin olmayan yoxuşları keçir, rahat və təhlükəsizdir, saatda 16 mil (1 mil-1609 m) sürətlə gedir və 14 sərnişin tutur.
          Azərbaycanda ən çox yayılmış ictimai nəqliyyat növü avtobusdur.
          Trolleybus Bakının küçələrində son zamanlar geniş istismar edilən nəqliyyat növüdür. Tramvay kimi o da elektrik enerjisinin köməyi ilə hərəkət edir. Fərq ondadır ki, trolleybusa rels lazım deyil. O, səssiz hərəkət edir, ətraf mühiti işlənmiş qazlarla çirkləndirmir.
          Yol hərəkəti qaydalarına əməl etmək yol-nəqliyyat hadisələrinin qarşısının alınmasının ən əsas amilidir. Yol-nəqliyyat hadisələrinin qarşısını almaq üçün təkcə sürücülərin deyil, piyadaların və sərnişinlərin də yol hərəkəti qaydalarını bilmələri və ona riayət etmələri vacibdir.
          Çox zaman yalnız sürücülərin təqsiri üzündən deyil, piyadaların, sərnişinlərin xüsusilə də uşaqların, yol hərəkəti qaydalarının bilməmələri, yaxud onlara əməl etməmələri üzündən bəxbəxt hadisələr baş verir.
          Küçə və yollarda nəqliyyat vasitələri ilə piyadaların eyni zamanda hərəkət etməsi hərəkətin mürəkkəbləşməsinə səbəb olur. Odur ki, hərəkətin təhlükəsizliyinin təmin edilməsi piyadaların diqqətli olmalarından, onların hərəkət qaydalarının bilmələrindən və bu qaydalara əməl etmələrindən çox asılıdır.
          Ümumi istifadədə olan nəqliyyatda, (yəni avtobus, trolleybus, tramvay və s.) müəyyən olunmuş qaydalara əməl olunması hər birimizin təhlükəsizliyinin qorunmasının əsas şərtlərindən biridir. İndi isə həmin bu qaydalarla tanış olaq.
          Bu qaydalar "Yol hərəkəti haqqında" Azərbaycan Respublikası Qanununun 40; 41-ci maddələri ilə müəyyən olunmuşdur.
          Sərnişinlərin minib-düşməsi üçün sürücülər tramvay, avtobus və trolleybusu dayanacaq adlanan yerlərdə saxlayırlar. Dayanacaqlarda marşrutların nömrələri yazılmış göstəricilər asılır. Sərnişinlər avtobusu, trolleybusu, tramvayı yalnız minmə meydançalarında, onlar olmadığı yerdə isə səkidə və ya yol kənarında gözləməlidirlər.
Səkinin lap kənarında durmaq olmaz, çünki büdrəyib və ya qışda sürüşüb maşınların təkəri altına düşə bilərsiniz.
          Tramvaya oturmaq üçün əvvəlcə küçənin hərəkət hissəsini keçmək lazımdır. Relslərin küçədə yerləşməsindən və hərəkətin istiqamətindən asılı olaraq müxtəlif vəziyyətlərlə üzləşirsiniz.
          - Tramvay yolu və dayanacağı yolun hərəkət hissəsinin ortasındadır.
          Bu halda yolun hərəkət hissəsinə çıxmamışdan qabaq yolun sol tərəfinə baxmaq lazımdır ki, nəqliyyat vasitələri yaxınlaşır, ya yox.
          Əgər yolun hərəkət hissəsində iki tərəfli hərəkət varsa, küçəni keçmək üçün əvvəlcə sola, küçənin ortasında isə sağa baxmaq lazımdır.
          Ümumi istifadədə olan nəqliyyat vasitəsinə minmə və ya ondan düşmə yolun hərəkət hissəsində və ya orada yerləşən minik meydançasında aparılır. Sürücü  dayanacaqda duran ümumi istifadədə olan nəqliyyat vasitəsinə doğru gedən və ya ondan düşüb gedən sərnişinlərə yol verməlidir (qapılar tərəfdən).
          İki qapılı avtobuslarda arxa qapıdan minib, qabaq qapıdan düşmək lazımdır. Bir çox böyük avtobuslarda, xüsusən, şəhərdaxili daşımalarda üç qapı olur. Belə halda orta qapıdan minib, arxa və qabaq qapıdan düşürlər. Axırıncı dayanacaqda bütün qapılardan minib düşməyə icazə verilir. Kənd yerlərində bir qapılı avtobuslardan daha çox istifadə olunur. Bü cür avtobuslarda minməyə düşmə tam qurtardıqdan sonra icazə verilir. 
          Avtobusa qabaq qapıdan minmək hüququna aşağıdakılar malikdirlər:
          a) hamilə qadınlar,
          b) əlillər,
          v) yanında 7 yaşına qədər uşaq olanlar,
          q) ibtidai sinif şagirdləri,
          d) qocalar.
          Tramvaydan sərnişinlər düşdükdən sonra birinci vaqonun qabaq qapısı istisna olmaqla bütün qapılardan minməyə icazə verilir.
          Trolleybusa minməyə ancaq arxa qapıdan icazə verilir.
          Ümumi istifadədə olan nəqliyyat növlərindən-tramvaydan, trolleybusdan, avtobusdan istifadə qaydalarına riayət etmək vacibdir. Onlardan minib düşərkən  tələsmək olmaz, sakit və mütəşəkkil olmaq lazımdır. Hansı qapıdan gəldi düşmək və ya düşmək istəyənlər vaqonlardan çıxmamış minmək bir-birinizə maneçilik yaradır, nəticədə avtobus, tramvay və trolleybus dayanacaqda xeyli vaxt itirir. Növbəti dayanacağa müəyyən edilmiş vaxtda çatmaq üçün sürücü sürəti artırmalı olur. Bütün avtobus, tramvay və trolleybusların  öz marşrut cədvəlləri olur. Gecikmədən vaxtında  dayanacaqlarda olub və oradan vaxtında yola düşməlidirlər.
          Biz küçələrdə gəzərkən piyada, lakin nəqliyyat vasitəsinə  mindikdə artıq sərnişin oluruq. Sərnişinlər qapıların bağlanmasına mane olmamalı, yaxud nəqliyyat vasitəsi tam dayanana kimi onları açmamalıdır. Avtobus, tramvay və trolleybusda yavaş-yavaş o qapıya tərəf yaxınlaşmalısan ki, oradan düşəcəksən. Hərdən sürücü  səs ucaldan vasitəsi ilə sərnişinlərdən qabaq tərəfə yaxınlaşmağı  xahiş edir.
          Aşağıdakı hallarda avtobus, tramvay və trolleybusda getmək qadağandır:
          - vətəndaş sərxoş vəziyyətdədirsə,
          - vətəndaş özü ilə tez alışan və zəhərli maddə aparırsa, daşınan əşyaların ölçüsü 100x60x60 sm-dən (tramvayda) və 100x50x30 sm-dən (avtobusda, trolleybusda) böyükdürsə,
          - vətəndaşın paltarı və ya apardığı əşya başqa sərnişinlərin paltarını və ya tramvay, avtobus və trolleybusun daxilini çirkləndirib korlayacaqsa.
          Ümumi istifadədə olan nəqliyyat vasitələrində aşağıdakılara icazə verilmir:
          - Siqaret çəkmək, zibilləmək;
          - Bədbəxt hadisə və qəzalar istisna olmaqla avtomaşının saxlanması üçün işarə verməyə;
          - Oturacaqda uşaqları ayaq üstə qoymağa;
          - Nəqliyyat vasitəsinin xarici hissələrində getməyə, qapı və pəncərələri sürücünün icazəsi olmadan açmağa, qapı və pəncərələrdən əl və ya başını çıxarmağa, qapıların bağlanmasına mane olmağa;
          - Hərəkət vaxtı minmə və düşməyə.
          Bunu hamı bilməlidir:
          - Dayanmış avtomobilin, trolleybusun və avtobusun yalnız arxasından, tramvayın isə qabağından adlayıb keçmək lazımdır. Bu qaydanı pozarkən siz yolu keçərkən düşdüyünüz nəqliyyatı ötüb keçən avtomaşını, yaxud qarşıdan gələn tramvayı görməz və nəticədə təhlükə ilə üzləşərsiniz.
          Bakının Zaqulba istirahət zonasında baş vermiş yol-nəqliyyat hadisəsi çox illər keçməsinə baxmayaraq, heç vaxt yaddan çıxmır. Zaqulba yolunda Daxili İşlər Nazirliyinin İstirahət evinin yanında «İkarus» markalı avtomaşın dayandı. Anasından tez düşən Nigar dayanmış avtobusun qabağından tələsik  yolun o biri tərəfində duran atasının yanına qaçmaq istədi. Bu vaxt avtobusu ötüb keçən göy rəngli «Jiquli» markalı avtomobil Nigarı vurub qarşıdan gələn başqa bir maşının təkərləri altına atdı. Köməyə gələn yol polisi əməkdaşları yaxınlaşdıqda Nigar artıq aldığı zərbədən ölmüşdü. O, ata-anasının tək balası idi. Anası nalə çəkib ağlayırdı. «Jiquli»nin sürücüsü isə özünü itirmişdi. Ana ona deyirdi: «Sizin günahınız yoxdur. Günah mənimdir». Nigar 4-cü  sinif şagirdi idi. Həqiqətən də bu hadisədə günahkar Nigar və onun anası idi. Ona görə də bütün valideynlərə müraciət edib deyirik.
 Hörmətli valideynlər!
          Yol hərəkəti qaydalarını həmçinin bu qaydaları pozmağın təhlükəsini öz uşaqlarınıza aydınlaşdırmaq Sizin ümdə vəzifənizdir. Uşaqlarınıza küçədə oynamağa icazə verməyin. Onları nəzarətsiz qoymayın.

Velosiped sürmə qaydaları

          1867-ci ilə Parisdə müasir velosipedə oxşayan mexanizm sənaye sərgisində nümayiş etdirildi. Sonralar bu təzə mexanizm bütün dünyada geniş yayıldı.
          İki təkərli velosipedi asanlıqla sürmək olur. Lakin asanlıqla da aşır. Yolda gözlənilməz bir nahamarlıq olduqda, qəflətən tormozladıqda bu, müvazinətin itməsinə gətirir və təhlükə yaradır. Velosiped ən təhlükəli və müvazinətsiz nəqliyyat vasitəsidir.
          Velosipedi  avtomobil kimi ani saxlamaq olmur. Onun tormoz yolu  avtomobilin tormoz yolundan uzundur. Deməli, təhlükəli zona uzundur. Tormoz vaxtı müvazinəti itirmək olar.
          Hesablamalar göstərir ki, velosiped avtomobildən 10 dəfə təhlükəlidir. Buradan nəticə çıxır ki, velosipedi idarə etmək üçün ağıl və böyük vərdiş tələb olunur. Velosipedçi yol hərəkəti qaydasını yaxşı bilib yerinə yetirməlidir ki, onunla və ya başqa  birisi ilə heç bir bədbəxt hadisə baş verməsin. Azərbaycan Respublikasında 14 yaşdan aşağı oğlan və qızlara avtomobil yollarında velosiped sürmək qadağandır. Asma mühərrikli velosipedi 16 yaşdan sonra sürməyə icazə verilir.
          Velosipedi sürməyə başlamazdan əvvəl müvazinətini saxlamağı öyrənmək lazımdır. Velosipedlə yavaş getmək tez getməkdən çətindir. Yavaş getməyi öyrənmək lazımdır. Yavaş getməyi öyrənəndən sonra  sürətlə getməyi öyrənməli, tormozları yoxlamalı, lakin birdən tormoz etməməlidir ki, yıxılmasın. Sonra tək əl ilə velosipedi sürməyi öyrənmək lazımdır.  Növbə ilə gah sağ əli, gah da sol əli buraxıb, velosipedi idarə  etməyi öyrənmək lazımdır. Bu ona görə vacibdir ki, döngələrdə bir əl ilə siqnal vermək lazım gəlir. Bir çox uşaqlar öz «igidlik»lərini göstərmək üçün  sükandan iki əlini də buraxırlar. Lakin belə «akrobat»ları küçə sevmir.
          Ən aşağı sürətlə velosipedi sürmək onu  sürməyi bacarmağın ən yaxşı göstəricisidir.
          Velosipedi sürməyə başlamazdan əvvəl onun sazlığını yoxlamaq lazımdır.
          Velosipeddə aşağıdakılar olmalıdır:
          - Tormoz- hər bir velosipeddə ayaq tormozu olmalıdır.
          - Səs siqnalı, adətən, zəng olur. Vaxtlı-vaxtında zəngin qapağını açıb ora yağ tökmək lazımdır.
          Bir çox uşaqlar elə hesab edirlər ki, fit və ya qışqırıq zəngi əvəz edir. Lakin küçədə fit çalmaq və ya qışqırıq ayıb sayılır, ona görə də bunlar səs siqnalını əvəz edə bilməz.
          Velosiped texniki cəhətdən saz olmaqla bərabər lazımınca təhciz olunmalıdır.
          Velosipedin qabaq tərəfində ağ işığı olan fanar,  arxasında isə qırmızı işığı olan fanar və ya işıq  əks etdirən qırmızı rəngli şüşə ilə təhciz olmalıdır. Günün qaranlıq vaxtında yanmayan fanarla velosipedi idarə etmək qadağandır. Velosipedin qırmızı rəngli arxa işıq əksetdirəni günün qaranlıq vaxtı və pis görünüşlü hava şəraitində sürücülərə imkan verir ki, vaxtında qarşıda gedən velosipedi görə bilsinlər.
          Yan tərəflərində qırmızı rəngli və ya sarıya çalan işıq əks etdirənləri olmalıdır ki, velosipedçi yaxşı görünsün.
          Pis olmaz ki, velosipeddə arxanı görmək üçün güzgü olsun.
          Yolun hərəkət hissəsi ilə velosipedlərin bir sıra ilə  hərəkət etməsinə icazə verilir. Bu zaman yolun sağ tərəfindən 1 m-dən çox olmayan  məsafə saxlamaq lazımdır.
          Sağa və sola dönərkən, ötmə əməliyyatı apararkən velosipedçi 30-40 m məsafədən xəbərdarlıq siqnalı verməlidir.
          Sağa dönərkən sağ əl, sola dönərkən sol əl müvafiq olaraq çiyin bərabərində qaldırılır. Manevr qurtaranadək əl qaldırılmış vəziyyətdə olmalıdır. Ən təhlükəli manevr sola və geriyə dönməkdir. Velosipedçi daha  çox bu halda yol hərəkəti qaydasını pozur və nəticədə qəza baş verir.
          Velosipedçiyə getdiyi istiqamətdə bir hərəkət zolağı olduqda sola və geriyə dönməyə icazə verilir. Adətən, avtomobilin bir hərəkət zolağının eni 3,5 m olur. Deməli, yolun eni 7-8 m olduqda velosipedçiyə sola dönmək olar. Sola dönərkən mərkəz xəttinə yaxın vəziyyət tutmaq lazımdır. Əgər bir istiqamətdə bir neçə hərəkət zolağı varsa, velosipedçi sola və geriyə dönmək üçün ondan düşüb piyadaların yol kəsişməsini keçərkən əməl etdiyi yol hərəkəti qaydasına  uyğun hərəkət etməlidir.
          Bütün təhlükəsizlik qaydalarına əməl etmək velosipedçinin xeyrinədir. Kim ki, yoldadır bu atalar sözünü yadından çıxarmamalıdır: «Yeddi dəfə ölç, bir dəfə biç».
          Yadda saxlayın:
          - Yolun hərəkət zolaqlarının sayından asılı olmayaraq velosipedçiyə yol kəsişməsini keçərkən düz istiqamətdə, ya da sağa dönməyə icazə verilir.
          - Velosipeddən düşmədən sola dönməyə o vaxt icazə verilir ki, yolda ancaq bir hərəkət zolağı vardır.
          Velosipedçiyə aşağıdakılar qadağandır:
          - Bulvar, bağ, parkların piyada yollarında, səkidə velosiped sürmək;
          - Sükanı tutmadan sürmək;
          - Dartılmaq üçün hərəkət edən nəqliyyatdan yapışmaq;
          - Avtobus, trolleybus və başqa avtomaşınların arxası ilə bilavasitə sürmək. Çünki həmin avtomaşın tormozladıqda toqquşma qaçılmazdır;
          - Velosipedi idarə etməyə mane olan yük və sərnişin daşımaq;
          - Texniki cəhətdən nasaz və lazımınca təhciz olunmayan velosipeddən istifadə etmək;
          - Velosipedi yol hərəkət qaydasını bilməyən başqa şəxsə vermək;
          - Günün qaranlıq vaxtlarında velosipedin qabaq və arxa fanarları olmadan sürmək;
          - Xəstə və çox yorğun vəziyyətdə velosiped sürmək.

Sürücülərin, svetoforun və nizamlayıcının verdiyi xəbərdarlıq işarələri