Təbiəti
Bozdağ yamacları demək olar ki, bitki örtüyündən məhrum olan, güclü erroziyaya məruz qalmış alçaq təpələrdən ibarətdir. Torpaqları açıq-şabalıdı və qonur torpaqlardır. Mülayim-isti və quru iqlimə malikdir.

Florası
Ərazinin 73%-ini meşə, 26%-ni isə qeyri-meşə sahələri təşkil edir. Respublikamızın ərazisində təsadüf edilən ardıcın 6 növündən 4-ə məhz burada təsadüf edilir. Kəsilmiş seyrək meşələrin yerində yovşanlı-dənli bitkilərlə, tək-tük fıstıq və ardıc ağacları ilə örtülü alçaq təpəli düzlər yaranmışdır. Bu ərazidə həmçinin İberiya palıdı, qarağac, Gürcüstan ağcaqayını, qovaq, cənub söyüdü, ziyilli qızılağac, iydə, Şərq doqquzdonu və s. kimi bitkilər geniş yayılmışdır. Burada 60 növ ağac və kol bitkilərinə təsadüf edilir. Bunlardan adi nar və adi üzüm Qırmızı Kitaba daxil edilmişdir.

Faunası
Qoruğun heyvanat aləmi azsaylı olmasına baxmayaraq, növ tərkibi etibarilə çox zəngindir. Burada 24 növ məmıli, 20 növ sürünən, 112 növ quş, 3 növ suda-quruda yaşayana rast gəlinir. 9 növ onurğalı heyvan Qırmızı Kitaba daxil edilmişdir. Burada ayı, qaban, meşə pişiyi, dovşan, porsuq, kəklik, qırqovul, ağbaş bayquş, qara kərkəs və sürünənlərdən isə gürzəyə təsadüf edilir.